啱啱睇個新症中年女人，問佢有冇長期要複診食藥等等。佢話佢自己冇病，不過呢幾年有去醫院複診。乜啲醫院咁好連冇病嘅人都睇？
原來佢之前第二期乳癌，做咗手術電療化療食埋鏢靶藥。而家冇復發徵象，所以佢唔打算話俾我知。我叫佢不如寫返係張病人資料嗰度，呢樣對我哋之後睇病都好有幫助。例如，如果你乳房突然搵到粒野，其他人我可能諗纖維瘤 等等，但係你嘅History我就會諗有冇乳癌復發嘅可能性。都係為你好啫～～
佢同我講話唔使寫，因為佢好返晒。根本都唔想講我知。唔緊要，大小姐你唔想晒力手寫落去張紙度，我自己照打入電腦囉。
入嚟睇個鼻生粒野，但係又唔想除口罩比我望，覺得好危險。你除口罩我要對住你，我都未話覺得危險？ ！
跟住話之前游完水隻腳有撻野好痕。我問佢之前即係幾耐嘅事，佢愕然望住我話梗係11月啦，之後嗰個XX泳池都冇開門啦！唔俾你暑假去游水嘅？我廿四小時跟住你知道你幾時做乜嘅？我今日第一次見你咋！
好，痴線嘅我就快啲睇完就算。我話開藥膏比佢，話有抗敏感藥膏溫和啲，同埋類固醇勁啲，想要邊隻。佢又當我傻咁望住我，話梗係兩隻都比我啦。唔通你要我用完一隻唔好先再返嚟搵你咩？
大佬，有啲人唔鍾意用類固醇，有啲又可能自己已經用咗無比膏覺得冇用，淨係想落嚟攞類固醇，我都要問㗎！
每一句你都可以辣慶我，你真係叻呀！
琴日食咗個台灣釋迦果，我想幻想係手榴彈一嘢定死佢。
Search